اسلام آباد (پاک ٹوڈے): وفاقی وزیر پارلیمانی امور طارق فضل چوہدری نے اعلان کیا ہے کہ اکتوبر میں نئے صوبوں کے قیام کے معاملے پر پارلیمنٹ میں بحث کرائی جائے گی۔
میڈیا سے گفتگو کرتے ہوئے طارق فضل چوہدری نے کہا کہ نئے صوبوں کے قیام سے متعلق بحث کا اصل مقام پارلیمنٹ ہی ہے۔
انہوں نے بتایا کہ اکتوبر میں قومی اسمبلی اور سینیٹ کے اجلاس ہوں گے، جن میں نئے صوبوں کے قیام کے معاملے پر بحث کی جائے گی۔
وفاقی وزیر نے مزید کہا کہ اسلام آباد ایک نئے گورننس ماڈل کو اختیار کرنے جا رہا ہے۔
واضح رہے کہ اس سے قبل پاکستان پیپلز پارٹی کے چیئرمین بلاول بھٹو زرداری نے بھی مطالبہ کیا تھا کہ صوبوں کے معاملے پر بزنس فورمز کے بجائے قومی اسمبلی میں بحث کی جائے۔
لندن میں میڈیا سے گفتگو کرتے ہوئے بلاول بھٹو زرداری نے کہا تھا کہ صوبوں کے حوالے سے پیپلز پارٹی کا مؤقف واضح ہے۔ ان کا کہنا تھا کہ اگر موجودہ نظام ناکام ہوا ہے تو اس پر قومی اسمبلی میں باقاعدہ بحث ہونی چاہیے۔
