اسلام آباد (پاک ٹوڈے): پاکستان انسدادِ پولیو پروگرام نے ملک بھر میں انسدادِ پولیو مہمات میں بنیادی کردار ادا کرنے والے فرنٹ لائن ورکرز کی خدمات کا اعتراف کرتے ہوئے ان کے یومیہ معاوضے میں 28 فیصد اضافے کا اہم اعلان کیا ہے۔
نیشنل ایمرجنسی آپریشنز سینٹر (ای او سی) کی جانب سے جاری کردہ تفصیلات کے مطابق معاوضے میں کیے گئے اس اضافے کا براہِ راست اطلاق رواں ماہ سے شروع ہونے والی اگلی قومی انسدادِ پولیو مہم سے ہوگا۔
ترجمان کے مطابق ملک گیر انسدادِ پولیو مہم 21 سے 27 ستمبر تک جاری رہے گی، جو پاکستان کے 115 اضلاع میں ایک ساتھ چلائی جائے گی۔ اس سات روزہ مہم کے دوران 3 کروڑ 10 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
ای او سی حکام کا کہنا ہے کہ فرنٹ لائن پولیو ورکرز کی سخت محنت اور جذبے کے پیش نظر ان کی مالی معاونت کو بہتر بنانا وقت کی اہم ضرورت تھی، اور معاوضے میں اضافے سے ورکرز کا ہدف کے حصول کے لیے حوصلہ مزید بلند ہوگا۔
