پشاور (پاک ٹوڈے): آل پاکستان گڈز ٹرانسپورٹ اتحاد نے پیٹرولیم مصنوعات کی قیمتوں میں حالیہ مسلسل اضافے کی شدید مذمت کرتے ہوئے ملک بھر میں مال بردار گاڑیوں کے کرایوں میں فوری طور پر 5 فیصد اضافے کا اعلان کر دیا ہے۔
پاک ٹوڈے کے مطابق آل پاکستان گڈز ٹرانسپورٹ اتحاد کے مرکزی صدر ملک شہزاد اعوان نے پیٹرولیم مصنوعات کے نرخوں میں مسلسل اضافے پر تشویش کا اظہار کرتے ہوئے کہا کہ روزانہ کی بنیاد پر قیمتوں میں تبدیلی کا فیصلہ ٹرانسپورٹ کے شعبے کے لیے کسی طور قابلِ قبول نہیں ہے۔
انہوں نے مزید کہا کہ گزشتہ 17 روز کے مختصر عرصے میں ڈیزل کی قیمت میں 19 روپے اور پیٹرول کی قیمت میں 20 روپے فی لیٹر کا بھاری اضافہ کیا جا چکا ہے، جس کے باعث ٹرانسپورٹ برادری کے لیے پرانے کرایوں پر گاڑیاں چلانا ناممکن ہو گیا ہے۔
ملک شہزاد اعوان نے حکومت سے مطالبات پیش کرتے ہوئے کہا کہ پیٹرولیم مصنوعات کی قیمتوں پر فوری نظرِ ثانی کی جائے اور ٹرانسپورٹ کے شعبے کو ریلیف فراہم کیا جائے، بصورتِ دیگر کرایوں میں مجبوری کے تحت مزید اضافہ بھی ممکن ہے۔
