اسلام آباد (پاک ٹوڈے): پاکستان تحریک انصاف (پی ٹی آئی) نے سندھ میں اپنی اسٹریٹ موومنٹ کا باقاعدہ آغاز کرنے کا فیصلہ کر لیا ہے۔ صوبائی وزیر اطلاعات شفیع جان کے مطابق وزیراعلیٰ خیبرپختونخوا سہیل آفریدی، پارٹی کی مرکزی و صوبائی قیادت کے ہمراہ سندھ پہنچ رہے ہیں، جہاں اس تحریک کا باقاعدہ آغاز ضلع گھوٹکی کے علاقے کامو شہید سے ہوگا اور وزیراعلیٰ کارکنوں سے خطاب کریں گے۔
پاک ٹوڈے کو موصول ہونے والی تفصیلات کے مطابق، کامو شہید کے بعد پارٹی قیادت ضلع کشمور کے شہر کندھ کوٹ پہنچے گی جہاں ایک بڑے عوامی اجتماع سے خطاب کیا جائے گا، جبکہ جیکب آباد میں بھی بھرپور عوامی رابطہ مہم چلائی جائے گی۔ وزیر اطلاعات شفیع جان کا کہنا ہے کہ سندھ میں شروع ہونے والی یہ اسٹریٹ موومنٹ پی ٹی آئی کی عوامی جدوجہد کو فیصلہ کن مرحلے میں داخل کرے گی۔
وزیر اطلاعات نے عمران خان کے ساتھ مبینہ سیاسی انتقام کا ذکر کرتے ہوئے کہا کہ عدالتی احکامات کے باوجود بانی پی ٹی آئی کی بہنوں کو ان سے ملاقات کی اجازت نہیں دی جا رہی۔ انہوں نے الزام عائد کیا کہ "فارم 47 کی مینڈیٹ چور حکومت” عدالتی احکامات کی مسلسل خلاف ورزی کر رہی ہے۔ پارٹی کا مطالبہ ہے کہ سپریم کورٹ کے احکامات کے مطابق عمران خان کو الشفا ہسپتال منتقل کیا جائے اور ان کی فیملی سے ملاقاتوں پر من و عن عمل درآمد ہو۔
شفیع جان نے مزید کہا کہ 27 ستمبر کے لانگ مارچ کے اعلان سے حکمران شدید خوفزدہ ہیں، تاہم اسلام آباد کی جانب یہ لانگ مارچ ہر صورت ہوگا۔ پی ٹی آئی سندھ کے عوام کے ساتھ مل کر عمران خان کی رہائی اور آئین و قانون کی بالادستی کے لیے جدوجہد جاری رکھے گی۔
واضح رہے کہ تحریک انصاف عمران خان کی رہائی، انتخابات میں مبینہ دھاندلی اور عدالتی احکامات پر عملدرآمد کے لیے مسلسل احتجاجی تحاریک چلا رہی ہے، اور خیبرپختونخوا کی قیادت کا سندھ کا دورہ اسی سلسلۃ العمل کی ایک اہم کڑی ہے۔
