پشاور (پاک ٹوڈے): خیبرپختونخوا میں شہریوں کے لیے لرنر ڈرائیونگ لائسنس کے حصول کا طریقہ آسان بنا دیا گیا ہے، اب شہری گھر بیٹھے ’’دستک ایپ‘‘ کے ذریعے لرنر ڈرائیونگ لائسنس حاصل کر سکیں گے۔
نئے طریقہ کار کے تحت درخواست گزاروں کو لائسنس کے حصول کے لیے متعلقہ دفاتر کے چکر لگانے کی ضرورت نہیں ہوگی۔ شہری دستک ایپ پر اپنی پروفائل بنائیں اور لرنر ڈرائیونگ لائسنس کے لیے درخواست جمع کرائیں۔
درخواست کے بعد نادرا چالان ڈاؤن لوڈ کرکے قریبی نادرا سینٹر سے تصدیق کروائی جا سکتی ہے، جبکہ پاک آئی ڈی ایپ کے ذریعے بائیومیٹرک تصدیق کا آپشن بھی موجود ہے۔
بائیومیٹرک تصدیق مکمل ہونے کے بعد دستک ایپ سے فیس کا واؤچر حاصل کیا جا سکے گا، جس کی ادائیگی ایزی پیسہ یا کسی بھی بینکنگ ایپ کے ذریعے ون بل سسٹم کے تحت آن لائن کی جا سکتی ہے۔
فیس کی ادائیگی مکمل ہونے پر شہری دستک ایپ سے اپنا لرنر پرمٹ ڈاؤن لوڈ کر سکیں گے۔
