راولپنڈی میں اینکرپرسن ربیعہ احسن قتل، شوہر حراست میں لے لیا گیا

راولپنڈی (پاک ٹوڈے): راولپنڈی کے علاقے گلشن آباد سیکٹر ٹو میں گھر کے اندر فائرنگ سے اینکرپرسن ربیعہ احسن جاں بحق ہوگئیں۔ پولیس نے واقعے کے بعد ان کے شوہر کو حراست میں لے کر قتل کی تحقیقات شروع کردی ہیں۔

سی پی او راولپنڈی حسن مشتاق سکھیرا کے مطابق ربیعہ احسن کی لاش گھر کے بیڈ روم سے ملی، جبکہ انہیں گردن کے نیچے گولی لگی تھی۔

پولیس حکام کا کہنا ہے کہ واقعے میں استعمال ہونے والا پستول برآمد کرلیا گیا ہے۔ جائے وقوعہ سے شواہد اکٹھے کیے جا رہے ہیں اور واقعے کے تمام پہلوؤں کا جائزہ لیا جا رہا ہے۔

سی پی او راولپنڈی کے مطابق مقتولہ کے شوہر کو حراست میں لے لیا گیا ہے جبکہ واقعے کا مقدمہ درج کرنے کی کارروائی جاری ہے۔