واشنگٹن (پاک ٹوڈے): امریکی وزیر خارجہ مارکو روبیو کے بارے میں اطلاعات سامنے آئی ہیں کہ وہ 2028 کے صدارتی انتخابات میں ریپبلکن پارٹی کی نامزدگی حاصل کرنے کی تیاری کے لیے صدر ڈونلڈ ٹرمپ کی انتظامیہ سے مستعفی ہو سکتے ہیں۔
برطانوی اخبار کی رپورٹ کے مطابق امریکی ریپبلکن پارٹی اور برطانوی حکومت کے بعض ذرائع کا کہنا ہے کہ روبیو صدارتی انتخابات میں حصہ لینے کی تیاری کر رہے ہیں، جہاں نائب صدر جے ڈی وینس کو ان کا ممکنہ حریف قرار دیا جا رہا ہے۔
رپورٹ میں کہا گیا ہے کہ وسط مدتی انتخابات میں ریپبلکن پارٹی کی شکست اور کانگریس کے ایوانِ نمائندگان اور سینیٹ کا کنٹرول کھونے کے بعد ٹرمپ انتظامیہ پر دباؤ بڑھ گیا ہے۔
ایک امریکی ذریعے کے مطابق روبیو کو ایران جنگ سے خود کو الگ کرتے ہوئے اس کی سیاسی ذمہ داری صدر ٹرمپ پر ڈالنے کی ضرورت ہے۔ رپورٹ میں یہ بھی کہا گیا ہے کہ ٹرمپ انتظامیہ سے علیحدگی روبیو کو اپنی صدارتی مہم کی تیاری کا موقع دے سکتی ہے۔
تاہم امریکی محکمہ خارجہ کے ترجمان ڈیلن جانسن نے روبیو کے مستعفی ہونے سے متعلق رپورٹ کو بے بنیاد قرار دیتے ہوئے مسترد کردیا ہے۔ روبیو نے بھی ایک انٹرویو میں کہا ہے کہ ان کا منصوبہ ٹرمپ کی مدتِ صدارت کے اختتام تک انتظامیہ میں کام جاری رکھنے کا ہے۔
