پاکستان ویمنز کی عمدہ اسپن بولنگ، اسکاٹ لینڈ 124 رنز تک محدود

پشاور (پاک ٹوڈے): آئی سی سی ویمنز ایمرجنگ نیشنز ٹرافی 2026 کے سپر سکس مرحلے کے اہم مقابلے میں پاکستان ویمنز ٹیم نے شاندار بولنگ کا مظاہرہ کرتے ہوئے اسکاٹ لینڈ ویمنز کو مقررہ 20 اوورز میں 5 وکٹوں کے نقصان پر 124 رنز تک محدود کر دیا۔

سیون ڈسٹرکٹس گراؤنڈ، عجمان میں کھیلے جانے والے میچ میں پاکستان ویمنز کی کپتان منیبہ علی نے ٹاس جیت کر پہلے فیلڈنگ کا فیصلہ کیا، جو درست ثابت ہوا۔ پاکستانی اسپنرز نے ابتدا ہی سے اسکاٹش بیٹرز کو دباؤ میں رکھا اور رنز بنانے کی رفتار محدود کیے رکھی۔

اسکاٹ لینڈ کی جانب سے کپتان کیتھرین برائس نمایاں بیٹر رہیں۔ انہوں نے 36 گیندوں پر 7 چوکوں اور ایک چھکے کی مدد سے 53 رنز کی نصف سنچری اسکور کی۔ کیتھرین فریزر 21، ڈارسی کارٹر 18 اور سارہ برائس 17 رنز بنا کر نمایاں رہیں۔

پاکستان کی جانب سے ام ہانی نے 2 وکٹیں حاصل کیں، جبکہ عمائمہ سہیل، نشرہ سندھو، طوبیٰ حسن اور مومنہ ریاض نے ایک، ایک کھلاڑی کو آؤٹ کیا۔ پاکستانی فیلڈرز نے بھی عمدہ کارکردگی دکھاتے ہوئے اہم کیچز پکڑے۔

آخری اوورز میں بھی پاکستانی بولرز نے اسکاٹش بیٹرز کو کھل کر کھیلنے کا موقع نہیں دیا، جس کے باعث اسکاٹ لینڈ بڑا مجموعہ ترتیب دینے میں ناکام رہی۔

اسکاٹ لینڈ کی جانب سے دیے گئے 125 رنز کے ہدف کے تعاقب میں پاکستان ویمنز ٹیم کو فتح کے لیے 120 گیندوں پر 125 رنز درکار ہیں۔

Related posts

ایشیا کپ میں پاکستان اے نے بھارت اے کو 314 رنز کا ہدف دے دیا، پوری ٹیم 313 رنز پر آؤٹ

تھر اور عمرکوٹ کے خشک سالی متاثرین کے لیے 5 ارب 30 کروڑ روپے کے امدادی پیکیج کی منظوری

چھوٹے صوبوں کے قیام سے ملک کمزور نہیں ہوگا، تحریک انصاف نے کبھی نئے صوبوں کی مخالفت نہیں کی: شوکت یوسفزئی