خیبرپختونخوا میں ایمرجنسی نافذ، وزیراعلیٰ اور صوبائی کابینہ عہدوں سے فارغ

اسلام آباد (پاک ٹوڈے): صدر مملکت آصف علی زرداری نے خیبرپختونخوا میں ایمرجنسی نافذ کرنے کا اعلان کر دیا ہے۔ فراہم کردہ صدارتی اعلامیے کے مطابق یہ اقدام صوبے میں سنگین صورتحال کے پیش نظر آئین کے آرٹیکل 232(1) اور 234(1) کے تحت کیا گیا ہے، جس کا نفاذ فوری طور پر ہوگا۔

اعلامیے میں کہا گیا ہے کہ موجودہ حالات میں صوبائی حکومت کو آئین کے مطابق چلانا ممکن نہیں، جس کے پیش نظر وفاقی حکومت گورنر خیبرپختونخوا کو صوبائی حکومت کے تمام یا بعض امور اپنے اختیار میں لینے کی ہدایت دے سکے گی۔

صدارتی اعلامیے کے مطابق گورنر خیبرپختونخوا وفاقی حکومت کی جانب سے تفویض کردہ صوبائی حکومتی امور انجام دیں گے، جبکہ صوبائی اسمبلی کے اختیارات پارلیمان یا اس کے اختیار کے تحت استعمال کیے جا سکیں گے۔

اعلامیے میں مزید کہا گیا ہے کہ صوبائی اسمبلی کے علاوہ صوبے کے دیگر اداروں اور حکام کے تمام یا بعض اختیارات بھی وفاقی حکومت کی ہدایت پر گورنر استعمال کر سکیں گے۔

صدارتی اعلان کے مطابق وزیراعلیٰ خیبرپختونخوا، صوبائی وزرا، مشیران، معاونینِ خصوصی اور ایڈووکیٹ جنرل اپنے عہدے فوری طور پر چھوڑ دیں گے۔ اعلامیے میں ایمرجنسی کے نفاذ کو فوری طور پر مؤثر قرار دیا گیا ہے۔