یورپ کے نئے سکیورٹی نظام پر بات چیت خطرناک ہو سکتی ہے، زیلنسکی کا انتباہ

کیف (پاک ٹوڈے): یوکرین کے صدر وولودیمیر زیلنسکی نے خبردار کیا ہے کہ یورپ کے نئے سکیورٹی نظام اور سلامتی کی ضمانتوں پر نظرثانی سے متعلق بات چیت خطرناک ثابت ہو سکتی ہے۔

زیلنسکی کا کہنا ہے کہ روسی صدر ولادیمیر پیوٹن کی یورپ کی سرحدیں تبدیل کرنے کی خواہش ایک حقیقت ہے اور ان کے خیال میں یہ خواہش یورپ میں سلامتی کی ضمانتوں سے متعلق پیوٹن کے تصور کا حصہ ہے۔

انہوں نے یورپی سلامتی کے مستقبل پر تحفظات کا اظہار کرتے ہوئے کہا کہ یورپی ممالک کو اپنے براعظم کی سلامتی سے متعلق فیصلے خود کرنے چاہییں۔

انہوں نے زور دیا کہ یورپ کی سلامتی سے متعلق کسی بھی نئے انتظام کا فیصلہ یورپی ممالک کو خود کرنا چاہیے اور روس کو براعظم کے مستقبل اور نیٹو کے کردار سے متعلق فیصلوں پر اثرانداز ہونے کا موقع نہیں ملنا چاہیے۔

زیلنسکی کے مطابق کسی نئے سکیورٹی نظام پر بات چیت سے پہلے یوکرین میں جنگ بندی، جنگ کا خاتمہ اور یوکرین کے لیے قابلِ اعتماد سکیورٹی ضمانتوں کو یقینی بنانا ضروری ہے۔